A presentación da XV Travesía do Xalo serviu para dar a coñecer as novidades dunha edición moi especial, que se celebrará o 25 de abril e combinará actividade deportiva e programación festiva durante toda a fin de semana en Castelo. A cita, que conmemora os quince anos da proba, recupera a carreira curta, amplía a proposta de ocio e reforza o seu carácter comunitario e popular.
A Travesía do Xalo xa quenta motores para unha edición moi especial. Hoxe presentouse oficialmente en Castelo a XV edición dunha das citas máis recoñecibles do calendario galego de carreiras de montaña e sendeirismo, que o vindeiro 25 de abril celebrará quince anos de historia cunha programación ampliada que combinará deporte, monte e ambiente festivo durante toda a fin de semana.
O acto de presentación, celebrado no Campo da Capela de San Ramón nun ambiente familiar e veciñal, serviu tamén para inaugurar a exposición ‘Quince anos no monte’, unha mostra fotográfica e documental que percorre a historia da Travesía desde os seus inicios ata a actualidade.
Unha edición que recupera as dúas distancias de carreira
A principal novidade desta edición será a recuperación da carreira curta, que volverá formar parte da programación tras varias edicións sen celebrarse. Deste xeito, a xornada contará novamente con dúas distancias competitivas, ademais da tradicional andaina e das categorías infantís.
A carreira curta terá un percorrido de 9,9 quilómetros e un desnivel acumulado de 820 metros, mentres que a proba longa contará con 19,5 quilómetros e 2.729 metros de desnivel acumulado. Pola súa banda, a andaina ofrecerá un trazado de 9,7 quilómetros, compartindo aproximadamente a metade do percorrido coa carreira curta.
Segundo explicou durante a presentación o director da Travesía, Juan Carlos Vázquez, esta edición permitirá descubrir novas zonas do monte abertas especificamente para a proba, ampliando así o percorrido habitual e permitindo ás persoas participantes coñecer máis espazos do Monte Xalo e do concello de Culleredo.
Unha fin de semana para vivir a festa do monte
A outra gran novidade deste 2026 será a ampliación da programación máis alá da propia proba deportiva. Por primeira vez, a actividade estenderase durante toda a fin de semana arredor da Taberna de Castelo, convertendo a Travesía nun evento pensado para desfrutar tamén fóra da competición.
A programación comezará o venres 24 de abril, coa apertura da taberna ás 16.00 horas e a recollida de dorsais. O sábado pola mañá, a saída das probas volverá realizarse desde a praza de Casa Rodríguez, recuperando así un espazo moi simbólico para a historia recente da Travesía.
Xa pola tarde, a celebración continuará con concertos, entrega de premios, homenaxes ás persoas que fixeron posible estes quince anos de historia e ás participantes máis habituais da proba, ademais da tradicional churrascada da Travesía. A programación completarase o domingo cunha sesión vermú para pechar a fin de semana festiva.
Como se resumiu durante a presentación, ‘a Travesía é a festa do monte, ademais da travesía deportiva, e así queremos que siga sendo‘.
Unha proba construída desde a comunidade
Durante o acto, tanto a organización como as institucións presentes puxeron en valor o carácter colectivo e comunitario dunha proba que vai moito máis alá do deportivo e que se consolidou como unha referencia tamén social e cultural dentro da parroquia e do municipio.
Inscricións abertas ata o 21 de abril
As inscricións para participar na XV Travesía do Xalo continúan abertas ata o 21 de abril a través da plataforma de Emesports, cunha participación que supera xa as 500 persoas inscritas entre todas as modalidades.
Quince anos despois da súa primeira edición, a Travesía do Xalo reafirma así o seu compromiso co deporte, co territorio e coa comunidade, mantendo vivo o espírito co que naceu en 2010: abrir o Monte Xalo á xente e convertelo nun espazo de encontro, participación e convivencia arredor do deporte.