A tan só uns días da proba, a edición máis especial da Travesía do Xalo confirma unha participación récord, a máis alta de toda a súa historia, mentres Castelo se prepara para un novo encontro co deporte e o monte.
A XV Travesía do Xalo xa está lista para botar a andar. As inscricións pecháronse este 21 de abril cun total de 854 persoas participantes, unha cifra que confirma o bo momento dunha das citas máis consolidadas do calendario galego de carreiras de montaña e sendeirismo.
A menos dunha semana da celebración da proba, a parroquia de Castelo prepárase para recibir a centos de persoas que se repartirán entre as diferentes modalidades: carreira longa, carreira curta, andaina e carreiras infantís. Unha participación diversa, tanto en idades como en niveis, que volve situar a Travesía como un evento aberto e accesible, no que teñen cabida tanto quen compite como quen se achega ao monte desde unha perspectiva máis lúdica.
A resposta deste ano chega ademais nunha edición moi especial, na que a Travesía do Xalo cumpre quince anos de historia. Un percorrido no tempo que se traduce tamén nun crecemento progresivo da participación e na consolidación dun modelo de evento que combina actividade deportiva, contacto co medio natural e implicación comunitaria. A recuperación da carreira curta nesta edición e a aposta por seguir abrindo novos espazos do monte reforzan esa idea de continuidade e renovación constante.
Desde a organización destacan a boa acollida das inscricións e o ritmo constante de rexistros nas últimas semanas, que permitiron acadar unha cifra final moi próxima ao milleiro de participantes previsto inicialmente.
Nos próximos días daranse a coñecer todos os detalles prácticos para as persoas inscritas, así como a información completa sobre horarios, recomendacións e desenvolvemento da xornada, nunha edición que volverá encher o Monte Xalo de xente e actividade quince anos despois da súa primeira convocatoria.