Castelo Deporte participa un ano máis na organización da V Carreira e Andaina Solidaria polo Párkinson, que se celebrará o próximo 18 de outubro no Paseo Marítimo de O Burgo, en Culleredo. A iniciativa, organizada xunto coa Asociación Párkinson Galicia-Coruña e o Concello de Culleredo, reunirá deporte, solidariedade e participación arredor dunha causa común: apoiar ás persoas con párkinson, parkinsonismos e ás súas familias.
A colaboración entre Castelo Deporte e Párkinson Galicia-Coruña mantense un ano máis, dando continuidade a unha relación baseada no compromiso coa comunidade e coa participación.
Para Castelo Deporte, formar parte desta iniciativa supón entender o deporte tamén como unha ferramenta para crear comunidade, favorecer a participación e apoiar causas que importan. Unha filosofía que forma parte da actividade da asociación e que encaixa co carácter solidario desta carreira e andaina.
A Asociación Párkinson Galicia-Coruña, que naceu en 1996 da man dun grupo de persoas con párkinson e familiares, traballa desde hai tres décadas para mellorar a calidade de vida das persoas con párkinson e das súas familias, ofrecendo unha atención integral e promovendo a sensibilización, a formación e o apoio social.
A V Carreira e Andaina Solidaria chega, ademais, nun ano especial para a Asociación Párkinson Galicia-Coruña, que celebra o seu 30 aniversario baixo o lema 30 anos en movemento.
A xornada reunirá persoas de diferentes idades arredor da carreira e da andaina, nunha proposta na que a actividade física se converte tamén nunha forma de apoiar, visibilizar e acompañar ás persoas con párkinson e ás súas familias.